كلام والسلام | هل يدخل المصريون الجنة ؟!

القصة ببساطة ، ان الشيخ وليد مهساس إمام مسجد بالجزائر ، وأثناء صلاة التراويح ، جت قطة طلعت عليه ؛ وهو ساعدها عشان ما تقعش ، طلعت فوق كتفه ؛ وقربت منه وباسته ، وبعدين نزلت ، الصور بتاعة القطة دي ؛ اجتاحت السوشيال ميديا . وعلقت عليها شبكة سى ان ان الامريكية الشهيرة ؛ وحصدت مشاهدات بأكثر من مليار شحص حول العالم ! 

وسخر أحدهم من المشهد بقوله :

هناك قفزتان غيرتا تاريخ البشرية

 -قفزة أرمسترونج على سطح القمر 

- وقفزة القطة على كتف الشيخ مهساس

والحق .. ان كانت تلك القفزة ؛ ستدخل مهساس الجنة ( والله اعلم ) ؛ فان الاغلبية الساحقة من المصريين أولى بدخولها.

واللى بيتشعلقوا فى حبال الدنيا الدايبة ؛ وبيركبوا المترو والأوتوبيس والميكروباص والتوك توك ؛ وبيتزاحموا على طبق فول وقرصين طعمية وشوية مخلل على عربية فول على ناصية شارعهم ؛ ولا بيحسبوا حسبة برما مع فواتير الغاز والكهربا والميه ؛ وبيمونوا عربياتهم على اد الحال ببنزين 80 ؛ ولا بيودوا ولادهم مدارس حكومية ؛ وبيسألوا الله الرحمة من جشع التجار والحكومة والمدرسين الخصوصيين ؛ عشان يوفروا شوية فى مصاريف البيت ولا الغيط .

 ولا من اللى منهم فلاح ولا عامل يومية أرزقى على باب الله ؛ ممن يسألون الله حق النشوق ؛ ولا اللى بيجيبوا نص كيلو لحمة او فرخة برازيلى مستوردة ؛ عشان يحلفوا أنهم بياكلوها زى باقى خلق الله .

وبيبصوا بعين ردية لناس تانية خالص ؛ عايشين فى الكمبوند أبو 2 و3 و5 مليون للشقة ؛ و50 مليون للفيللا والقصر؛ واللى بيركبوا المرسيدس والفيرارى والبى أم دبليو والبورش والأودى أسم النبى حارسك. وبياكلوا السيمون فيميه ومدرك أيه ؛ وبيجيبوا أكل عزوماتهم وأفراحهم اللى بيعملوها بالملايين ؛ بالطيارة من باريس وغيرها . واللى بيسافروا فى الصيف والشتا كل سنة ؛ وبيعلموا ولادهم فى مدارس وجامعات دولية ؛وبيتعالجوا فى مستشفيات 7 نجوم ؛ وبيصيفوا فى هاسيندا ومراسى بعد مابقت مارينا موضة قديمة ؛ وبتاعة الناس البلدى . واللى بيبنوا القصور كل يوم ؛ ويسيبوا للغلابة الأسمرات وبشاير الخير وتكافل وكرامة ! 

وفى مصر كمان اللى عايشين بين دول ودول .. واللى لا طالوا عنب اليمن ولا بلح الشام ؛ واللى كانوا بيسموهم الطبقة المتوسطة ؛ واللى انقرضت وبقت من التراث الشعبى الجميل ؛ وتستاهل الصدقة فى الدنيا ؛ والجنة فى الأخرة ! 

المصريون .. قطتهم جمل !
---------------------------
بقلم : خالد حمزة