يا تشتغل رقاصة .. يا تعمل زى صاصا

مفيش حد أقابله : موظف عامل حرفى اعمال حرة كمسارى سواق كناس فلاح صحفىآآ  او حتى راجل ارزقجى على باب الله لحد ماتفرج . الا ويشكو مر الشكوى من العيشة واللى عايشينها وغلاء اسعار الميه والكهربا والغاز والبنزين والسولار

والبهدلة فى طوابير العيش .

والشعلقة فى ميكروباص والانتظار لساعات للاتوبيس ابو 2 جنيه.

وكمان شكاوى لاتنتهى .. من طلبات العيال وام العيال اللى ما بتنتهيش وبتزيد يوم ورا يوم

والغريب ان كل اللى باقابلهم مش مقتنعين باللى بتعمله الحكومة

واحترت وماعرفتش اجاوب الا بسخرية

ما هو شر البلية مايضحك ولا تعايرنىولا اعايرك يا امور

ده الهم طايلنى وطايلك ..

ولا.. ماتكنش فاكر ان العبد لله ولا مؤاخذة جاى من بلد ولا كوكب تانى يعنى

خلاصة القول.. جاوبت اللى سألنى بحاجتين لا تالت لهما

الاول ان يتوكل على الله ويشتغل رقاصةوالشغل مش عيب

وليكم فى صافى بنت نازآآ  الاسوة

يا مؤمن.. دى مع كل هزة وغمزة ولمزة

كده دولارات وكده يوروهات ..

وكمان الريالات والدراهم والدينارات

برضك ما يضرش

والست فوق ده وده ..عندها حضور وكاريزما

فشر اى زعيم سياسي

وهى.. اى الست صافى فى النهاية بتدفع ضرايبها بالملى للدولة

يعنى مش على راسها بطحة زى رجال الاعمال اياهمآآ  اللى ناهبين

طالعين نازلين

ده حل من حلين ..

ولو لامؤاخذة ماعندكش موهبة الهز من اى نوع ومنه الرقص الشرقى

فعليك بطريقة صاصا

واللى مالية البلد دلوقتى وبتكسب تمام

زى المنشار طالع واكل

نازل واكل

وصاصا لمن لا يعرف.. هو الاسم الحركى الذى يعرفه كل الناس الا صاحبه

راجل منافق

انتهازى

متلون واكل من كل الموايد

اخر حاجة

وزيد على ذلك بجح كمان

اكل على موائد القذافى الله يبشبش الطوبة اللى تحت راسه

واخذ من صدام الله يرحمه هو كمان

وباس القدم وابدى الندم فى حق معلمه صفوت الشريف ومبارك وزوجة مبارك واولاده كمان

وفوق ذلك... يقال عنه انه زى الموبايل الصينى : صوته عالى

ورخيص وبشريحتين

واحدة للريس الحالى

وواحدة للى بعده .

عاوزين كمان اقولكم

ده زمن الفهلوة

والالفطة

وتلبيس طاقية ده لده

و و و و و

فاذا كنتم لا تجيدون ولا تتقبلون التعلم

فعليه العوض فيا وفيكم

حكم

الفقر له ناسه ؟