كلام والسلام| منفوخ على ٢٨

مهما حاولت أن تُفهّمنى أو تُقنعنى أن حالى وحال الـ 100 مليون شخص نفر نفر سيكون أفضل لن أقتنع أبدا ولن أنصت إليك، ولو حلفت لى المية تصبح تمر هندى ولا نبيت من اللى قلبك يحبه لاسمح الله٠ 

ولو وقفت على راسك أو رقصت قدامى فشر صافينار واللا سامية جمال فى عزها لن ألتفت اليك. اسمع أنت منى ولا تقاطعنى، وسيبنى اقول الكلمتين اللى فى نفسى خصيمك النبى. واللا انت البعيد زى بعضهم شارب منقوع الصرم ولا مسطول على الدرجة العاشرة وفاهم إن كله حلو وكله جميل ومش شايف حالك وحال ملايين مثلك لا يهمهم أكبر كوبرى ولا أكبر كنيسة ولا أكبر جامع ولا موسوعة جينيس، الله يحرقها بجاز. 

بص حواليك وشوف الناس اللى ماشية تكلم نفسها فى الشارع وشوف حسبتهم مع برما فى مصاريف الكهربا والغاز والمية والبنزين والمواصلات والعيال وأم العيال وطلباتهم اللى ما بتخلصش٠ وشوف كمان مصاريف جواز البنت ومصروف الواد الشحط اللى اتخرج من الجامعة ومش لاقى شغل. وشوف عندك كمان زحمة الشوارع وأخلاق الناس اللى بقت زى الزفت، ولو سألت ليه يقولوا لك كان الله فى عونهم اللى بيشوفوه مايستحملوش جبل٠ شوف كل ده واده عشرين تلاتين قول ميت مرة ومانقولش إنى أو إنت من الطابور الخامس، وإلا معظم الناس يبقوا منه٠  وسألك حد إنت ليه مش مع البلد ولا مع اللى بيحصل فى البلد، قل له وخصيمك النبي أنا ابن البلد بس بجد ومش بالتهليل والتطبيل ولا بالتزمير، أنا معاها لحد ما تقوم بجد وتبقى مع الكبار بجد، وتبطل تعيش فى أوهام وأحلام وردية وبعدين تقوم على كابوس! 

اقروا التاريخ بجد واعرفوا إزاى قامت دول من تحت الرماد وشوفوا هتلر اللى جيش ألمانيا بطولها وعرضها وغزا اوروبا كلها وأصبح سيد العالم، بس نهايته كانت مذلة ليه ولبلده لأنه بنى غلط وأسس غلط ونسى حرية الناس قبل الخبز! وشوفوا محمد على اللىبنى مصر الحديثة إزاى بالبعثات والعلم فى كل المجالات ومعاها برده جيش قوى، بس نسى هو كمان كلمة الحرية للناس! وكانت نهاية مشروعه كله بعد وفاته بسنين قليلة ؟! ونفس الكلام بيتقال عن عبد الناصر والسادات ومبارك ومرسى كلهم حاولوا يبنوا بس نسوا إن فيه بني آدم مصرى يهمه الأكل والشرب، بس يهمه حريته أكتر، وإنه يكون بنى ادم طبيعى زى باقى البنى آدمين !
---------------------------
بقلم: خالد حمزة