كلام والسلام | كلمني عن امبارح.. وابعد عن بكرة!

اسأل أي حد في مصر: وماذا عن بكرة؟!

سيقول لك: بل السؤال وماذا عن لحظاتنا الحالية.. والتي تتغير بسرعة الصاروخ؟!

أسأل أى حد في مصر: وماذا عن أحلامك لبكرة؟

سيقول لك: بل السؤال وماذا عن استمرار معاناتك وأحباطاتك.. اللي عايشة معاك ومن امبارح والنهاردة .. ومكملة معاك لبكرة؟!

ليه.. التشاؤم ده!

سيقول لك: المقدمات تقود دائما للنتائج يا زميلي.. ولا أنت خواجة من بلاد برة؟!

والحق.. أنى لا خواجة ولا حاجة.. ولكنه سؤال سألته من قبلك.. وكانت الإجابة منى.. هى هى إجابتك بالضبط!

هل كانت مجرد توارد أفكار.. واللا مشاركة في الهم اللي رضينا بيه.. ومش عاوز يرضى بينا؟

والأحق .. أننى مثلك وقد أكون أكبر كثيرا أو أصغر قليلا.. بلغت من العمر بعض أرزله.. وأستعد للرحيل.. فلم يعد اللي باقي أكتر من اللي راح!

أنا مثلك.. علي الله حكايتي.. عانيت ومازلت أعانى مع العيشة واللي عايشينها.

عاصرت.. عهد الانغلاق  وربط الأحزمة.. ولا صوت يعلو فوق صوت المعركة والانكسارات والهزايم.. اللي سموها نكسة .. وأحلي من طعم المش مفيش؟

وعاصرت.. عهد الأنفتاح علي مصراعيه للحرامية والفاسدين والقطط السمان.. واللي مغتناش في عهده.. عمره ما كان هيغتني !

وعاصرت ومازلت.. في عهد المؤجلات من الأحلام اللي هى متحققتش.. والسبب هذه المرة.. حروب كورونا ووكسات ووو.. وكلها وبقدرة قادر.. بتيجي علي مصر بالذات؟!

لا تعايرنى ولا أعايرك ..

فكلنا يازميلي.. في الهم سواء..

صاحيين نايمين.. علي أسطوانة مشروخة واحدة وعلي شماعات عديدة.. للفشل!

صاحيين نايمين.. علي طبقة تتمدد وتصرف بسفه.. وتعيش داخل الكمباوندات.. وتقضى صيفها في مراسي وهاسيندا والعلمين ورأس الحكمة وهلم جرا.. وتصرف بالملايين علي حفلاتها الماجنة!

و طبقة.. تسأل الله حق النشوق وتكاليف العلاج والمواصلات والعيال اللي في المدارس وفواتير المية والغاز والكهرباء!

وما بينهما.. طبقة كانت تسمى بالمتوسطة.. راحت في الوبا!

لا تعايرنى ولا أعايرك ..

فكلنا يازميلي.. عايشين علي ذكراها.. ومستحملين يومنا بيومه.. ومعندناش أى أمل في بكره!

وأرجع وأقولك.. المقدمات تقود دائما للنتائج.. وأنا جاى لك من بكرة اللي لا أحلي من امبارح.. ولا ييجي قطرة في بحر النهاردة؟!
------------------------------
بقلم: خالد حمزة
[email protected]