كلام والسلام | كده دولارات .. كده استرليني

انزعج الناس بشدة .. من رؤية واحد محسوب عليهم فنان .. وهو يرقص ويتمايل بصورة غير لائقة، وكٱنه يقول لك : أنا زى الكف وبأقتل مية وٱلف .

والقصة مش قصة نمبر وان ولا حتي نورماندى تو ..

القصة أن ذلك الكائن كان بيمثل بلده وبيرفع علمها في أمريكا .

وأن ذلك الكائن كمان .. لابس فرعون علي طريقة راقصات البيلي دانس . يعني ولا مؤاخذة راقصات الدرجة العاشرة في شارع محمد علي زماااان .

واللي يضايقك أكتر ..

إن في ناس كتير في بلدك مش لاقية تاكل ولا تشرب . ..ولا تركب لامؤاخذة .

وذلك الكائن كمان وكمان .. مع كل هزة بياخد كده دولارات .. وكده استرليني .

واللي يضايقك أكتر ..

أن ده بقي سلو بلدنا الآن : التفاهة والضحالة .

وعبيله واديله .

بدءا من دراما رمضان اللي فات . ومشاهد القتل والدماء والنطاعة.. لناس صايعة ضائعة  وراقصات وعاهرات أحيانا وتحدى سافر للقيم والقانون . وإخراج لسان بالفم المليان .. لكل الدعوات بوقف هذه المهازل خلال الشهر الكريم .

واللي يضايقك أكتر وأكتر ..

أنهم قرروا وبعد توجيهات رئاسية .. أن يعيدوا النظر في مثل تلك التفاهات .

وقرروا تشكيل لجنة للنهوض بالدراما والقيم .

بل وقرروا الدخول لسوق الإنتاج الدرامى بقوة .

علي الرغم أن شركاتهم هى التي أنتجت تلك التفاهات .

دبل فيس يعني ..

يلهيك ويجيب اللي فيه فيك .

واللي يضايقك برده ..

أن واحدا منهم طالته الاتهامات . فلبسوه الليلة كلها ياحرام .. فقرر أن يهاجر للخارج . ويعتزل إلي حين .

كبش فداء يعنى .

ولكن .. عادت ريما لعادتها القديمة .. وعادت القنوات لأستضافة نجوم تلك التفاهات علي شاشاتها .. اللي هى تابعة لهم  كمان . وكٱنك يا ٱبو زيد ماغزيت .

الناس بتنسي والحمد لله .

والست اللي بتعرى جسدها ولا مؤاخذة .

يلاحقونها بالاتهامات .. لأنها ماشية مشي بطال .

أما إذا ظهرت نفس الست بنفس العرى في مسلسل ..

فهى فنانة يشار لها بالبنان .. وبأبو وأم البنان كمان .

ولا يبعدك عن تلك التفاهات المقصودة .. جدل صار لأسابيع عن لاعب انتقل من الزمالك للأهلي .. بنص مليار جنيه . أي والله .

شغلونا يابا .. علي رٱي الراحل محمد رشدى ..

واحنا غلابة .

قاعدين أمام التليفزيون .. علي مقاعد المتفرجين . نرى ده ونقيم ده ..

وهم يتلاعبون بنا علي طريقة : بص العصفورة .

هم يقبضون بالملايين ..

ونحن تتصارع علي ملاليم مرتبات الحكومة  والمعاشات وتكافل وكرامة والعمال الموسميين .

اقرع صحيح  ونزهى . أيها المواطن الكحيان .

تماما مثل الكحيت .

أوهى حلاوة روح .. من ناس عايشة بطلوع الروح .
--------------------------------
بقلم: خالد حمزة
[email protected]