كلام والسلام | في دولة خرابستان

احتار الملك وحاشيته.. ماذا هم فاعلون، في كل يوم الموتى بالعشرات  .. لألف سبب وسبب.

البعض مات من حوادث طرق الدواب والحمير والعربات الخشبية .. لايوجد حسيب ولا رقيب فخامتك .. الناس ماشية تخبط في بعضها بالشوارع .. واكلين تاتورة فخامتك.

والبعض مات لضيق العيش والجوع والمجاعة التي اجتاحت المملكة .. لم يقدروا علي توفير قوت يومهم هم وعيالهم . هم السبب فخامتك بيخلفوا كتير . والعدد عندهم في الليمون.. يستاهلوا اللي بيجرى لهم .

والبعض مات من الحيرة بعد أن عجز عن تسديد أجرة بيته المتواضع الذى ورثه أبا عن جد .. عايشين بالسحت. . مفيش حاجة ببلاش . يستاهلوا فخامتك .

والبعض مات بإرادته الحرة . فالقي نفسه من أعلي برج  بالمملكة .. كافر فخامتك . وحسابه عند الله عسير . مقدرش يصبر معانا كام عشرة عشرين سنة . والصبر مفتاح الفرج.

والبعض مات وهو يضحك . اي والله فخامتك . لم يتحمل الفرحة من عظم إنجازاتك . التي شابت لها الولدان .

العشرات يموتون فخامتك كل يوم .  والحمد لله ليس لسبب واحد والا كانوا اتهمونا كلهم في نفس واحد  .. به.

المشكلة .. فخامتك.

أن القبور اصبحت أقل بكثير في مملكتك .. من عدد الموتى.

واننا نضطر لدفن عدة أشخاص في قبر لايتسع الا لفرد واحد.

والحل ..

نريد ميزانية خاصة للموتى .. للصرف علي الاكفان والمقابر والذى منه .

ومنين نجيب الفلوس .. انتم  هتسرقوا الدولة يعني .. اللي جاى مش مكفى اللي رايح.

افرض ضريبة فخامتك علي الأحياء لصالح الأموات . وآهو الأحياء هيحصلوا الأموات .. قريبا جدا . المصلحة واحدة .

وتفرض ضريبة تانية برضه علي الاحياء .. ودى لإيه كمان ؟.

عشان نستحدث فخامتك وزارة لنقل الموتى .

واهو كله بثوابه .

وما دايم إلا وجه الله .
------------------------
بقلم: خالد حمزة
[email protected]