كلام والسلام| شالوا مصطفي .. وجابوا مدبولي

التغيير سنة الحياة .. إلا في مصر .

ومع د. مصطفى مدبولى مش هقدر تغمض عينيك.

واللي تعرفه أحسن من اللي متعرفوش.

وعليه العوض ومنه العوض.

ويبدو أن مصر مش ولادة زى ماقال الأقرع. ويبدو أنه ليس في الإمكان أبدع مما كان.

نفس السياسات، ولايهم هنا نفس الوجوه ولا الشخصيات. المهم أنك برده لسه علي قديمه مع حكومتك الميمونة.

وبرده لسه مع قديمه بشكواك التى لا تنتهي أبدا.. مع العيشة واللي عايشينها. ومع فواتير الحياة المؤجلة. و الطموحات والأمال المركونة جنب حائط الزمن المتهالك في مصر.

أنت علي باقة .. من فات قديمه تاه.

أنت موعود بالوزراء بدون حقيبة. الذين لا شغلة ولا مشغلة لهم ليل نهار.. الا في الرغى في الفاضى والمليان.

أنت موعود بنفس السياسات.. مع الصندوق إياه.

مع هدم وتنكيس وسط البلد لصالح المستثمرين.. مصريين وعرب وأجانب .

مع زيادات غير مبررة لأسعار كل السلع والخدمات. واللي ممعهوش ما يلزموش. وهتدفع يعني هتدفع.

مع زيادة الدولار وجنون الذهب.. ولا عزاء للشباب المقبل علي الزواج. ولا حتى اللي مش لاقي وظيفة تسد الرمق.

مع بتوع تكافل وكرامة اللذين يزداد عددهم مع مطلع كل صباح.

مع طبقة كانت متوسطة قاءدة وبقت بترقص علي السلالم .. لا طايلة فوق ومشدودة لتحت.

مع أصحاب معاشات غلابة مساكين مش لاقيين اللضى. ولا لقمة العيش وسداد الفواتير والعلاج والسكن. وهنجيب لكم منين. احمدوا ربنا انكم لسه عايشين.

أنت وأنا لسه مكملين. وربنا يديني ويديك طول العمر. مع د. مدبولي.. طويل العمر يطول عمره.. وينصره علي مين يعاديه.
----------------------------
بقلم: خالد حمزة
[email protected]