كلام والسلام | احمد ربنا.. إنك عايش!

ليس صحيحا ان كل المصريين من عينتى وعينتك؛ من اللى بيتشعلقوا فى حبال الدنيا الدايبة؛ وبيركبوا المترو والأوتوبيس والميكروباص والتوك توك؛ وبيتزاحموا على طبق فول وقرصين طعمية وشوية مخلل على عربية فول على ناصية شارعهم؛ واللا بيحسبوا حسبة برما مع فواتير الغاز والكهربا والميه وبيمونوا عربياتهم على قد الحال ببنزين 80؛ ولا بيودوا ولادهم مدارس حكومية؛ عشان يوفروا شوية فى مصاريف البيت واللا الغيط. ولا من اللى منهم فلاح ولا عامل يومية أرزقى على باب الله؛ ممن يسألون الله حق النشوق؛ ولا اللى بيجيبوا نص كيلو اللحمة من الجمعيات؛ عشان يحلفوا أنهم بياكلوها زى باقى خلق الله.

هناك يا سيدى وفى مصر ناس تانية خالص؛ عايشين فى الكمبوند أبو 2 و3 و5 مليون للشقة و50 مليون للفيللا وأضعافها للقصر؛ واللى بيركبوا المرسيدس والفيرارى والبى أم دبليو والبورش والأودى أسم النبى حارسك. وبياكلوا السيمون فيميه ومدرك أيه؛ وبيجيبوا أكل عزوماتهم وأفراحهم اللى بيعملوها بالملايين؛ بالطيارة من باريس وغيرها.

واللى بيسافروا فى الصيف والشتا كل سنة؛ وبيعلموا ولادهم فى مدارس وجامعات دولية؛ وبيتعالجوا فى مستشفيات 7 نجوم؛ وبيصيفوا فى هاسيندا ومراسى والعلمين ورأس الحكمة وأخواتها؛ بعد مابقت مارينا موضة قديمة؛ وبتاعة الناس البلدى.

واللى بيبنوا القصور كل يوم ويسيبوا للغلابة الأسمرات وبشاير الخير وتكافل وكرامة وبطاقة التموين!

فى مصر فيه ده وده؛ وكمان اللى عايشين بين ده وده.. اللي لا طالوا عنب اليمن؛ ولا بلح الشام!

في مصر ..

اللي ممعهوش ما يلزموش. وكفاية عليه يقعد جنب الحيط ويندب حظه؛ اللي أسود من قرن الخروب.

ويحقد علي الناس التانية.. اللي اغتنت في عهده. واللي قبت علي وش القفص بين ليلة وضحاها.

كفاية عليه.. أنه لسه عايش بينهم.. وياريت عاجبه!
------------------------------------
بقلم: خالد حمزة
[email protected]