قصيدة "أبوس رجلك" رسالة الى مصر .. للشاعر: مجدي صلاح أبو سالم

أعاتبك؟ ولا .. أشكيلك!؟
و انا المصلوب على صدرك
رماني السيل
وطال الليل
وأعطيتي السفيه بدرك
------
بحبك، بس ليه تقسي على ولادي
و تاخدي مني فرحتهم وأعيادي
و اشوف الويل واقول حتروق
و يضحك وشّك المخنوق
ألاقيكي - و انا منّك
في افراحك بعيد عنك
في احزانك باشيل همك
---------
وباتفائل
وتتجنن حواريكي و اكون عاقل
وتاخدي لقمتي مني و اقول "أمي"!
ح نقسم حظنا المايل
دا انا لحدودك الحارس
و انا في علومك الفارس
وانا الفلاح وانا العامل
-----------
بحبك زي أجدادي و أحفادي
انا اللي جاي من صلبك
أنا إبنك أنا شعبك أنا جندك
أنا المغروس في غيطانك
------------
أبوس رجلك
ما تعطيش الخسيس أرضك ولا زادي
انا بفديكي يوم ورا يوم بأولادي
واشيل عن رجلك الأشواك
وتنسيني أنا الشقيان
و تعطي للغني وردك ؟!
-------------
باقولك إمشي في طريقي
فتمشي في طريق ضلمة !
وتفترس الكلاب أملك
وتكتئبي من الغمة
تناديني تلاقيني
واقف لك بالسلاح يامة
انا حروفك
و انا التشكيل
وانا الفتحة و انا الضمّة
-------------
أنا اللي نهاري متبهدل وليلي طويل
حفرتك في الجبال أنهار
وغنيتك كتير مواويل
بطول نيلك وموج بحرك
بوضح لك
أنا - لو كنتي شايفاني- أنا المجروح
بغطيكي وبحميكي منين ما باروح
من النوبة إلى سينا ومن غزة إلى مطروح
-------------
تقوليلي ياتاج راسي
يا أهلي وعزوتي وناسي
تعالى ابني أقول لبيك
فتدي للصوص دارك
وأحرس لك أنا الشبابيك!
-----------
تقولي اصنع أقول حاضر
تقولي ازرع اطاطي لك
ولا بارفض ولا اشتم ولا اتظاهر
وباغرق في الشتا فيكي و انا صابر
ما انا مصري
ودة أصلي
ومش واحد غريب عابر
-----------
أبوس رجلك على مهلك
دة انا مرهون على قشة
يوماتي ساقيتي بتدور لا بتغدا ولا اتعشا
لصوصك يسكنوا في قصور
وباسكن في الشتا عشة
دوايا فوق ومش لاقي
عضامي م المرض هشة
-------------
بحبك بس انا زعلان
انا من حقي ترضيني تراضيني
وتخديني على حجرك
ما انا سندك وانا ضهرك
-----------
أنا اللي كنت باشتاقلك
وفاتح لك دراعاتي
باقرّب خطوتين منك
عشان أهمس بآهاتي
تصديني بعيد عنك
لا انا عارف اقربلك ولا قادر أغيب عنك
ولو ييجي عليكي غريب
تلاقيني باموت قبلك
--------------
و امتى هتفتحي قلبك
تمدي لي ايدين رحمة
واعيش فيكي عزيز مستور
ولا خايف ولاعاجز ولا مقهور
و اغدي أسرتي لحمة
و الاقي هدمتين كستور
و أسكن أوضة فوق سطحك
و اسدد مايتي والنور
و اروح شغلي بدون زحمة
_________________
قصيدة: مجدي صلاح أبوسالم