فيديو.. ساويرس يطالب بالإفراج عن صحفى "الجزيرة" المتهم بـ"خلية الماريوت"

طالب رجل الأعمال، المهندس نجيب ساويرس بإطلاق سرح الصحفي محمد فاضل فهمي، الصحفي بقناة الجزيرة الإنجليزية، والمحكوم عليه بالسجن 7 سنوات في القضية المعروفة إعلاميا بـ«خليه الماريوت».

وقام «ساويرس» بتسجيل فيديو يؤكد فيه معرفته الجيدة بالصحفي، وناشد الرئيس عبدالفتاح السيسي، بالعفو عنه، وأن يأخذ القضاء في الاعتبار شهادته، موضحا أنه قدم هذه الشهادة مكتوبه في المحكمة.

وقال ساويرس في رسالته: «بهذا النداء أنا أحاول أن أساعد إنسان أنا مقتنع إنه بريئ. أنا أعرف الأخ محمد فهمي لما كان بيشتغل في (سي إن إن)، وهو إنسان مجتهد وجاي من عائله مصرية أصيله وأجداده فيهم اللي كان في البوليس والقضاء ولا يمكن محمد يكون داخل في أي عمل يضر بمصر، لأنه مصري صميم وشارك في 25 يناير وكان معنا في 30 يونيو ضد الإخوان، مش ممكن النهاردة يزج باسمه في موضوع يتعلق بجماعه الإخوان المسلمين. أنا بقول كدة عن قناعة وبرضي ضميري لأني حاسس إنه إنسان مظلوم ووضع ظلما في الموضوع ده. مفيش حد يختلف إن قناة الجزيرة دي قناة تحريضيه لكن صعب نعاقب كل واحد لمجرد إنه كان بيشوف أكل عيشه وعايز يبني مستقبله، هو كان داخل على جواز وبيدور على مستقبله لمجرد أنه اشتغل في المكان ده، لأنه لو حد متابع الحالة هو عارف أن هو أدان كثير من ممارستهم، ورفض الضغوط الخارجية كلها وقال أنا عايز بلدي هي اللي تنصفني».

وتابع: «أنا بالرسالة دي بأرجو سواء كان فيه عفو ممكن يتم من سيادة الرئيس أو سواء كان في أي مراحل قضائية أخرى، أن القضاء يأخذ في الاعتبار كل العوامل دي وأنا كتبت الشهادة بتاعتي مكتوبه في المحكمة. ونرجو أن ربنا يفك ضيقه لأن حرام نقضي على مستقبل الشاب بأحكام طويله يمكن أن تقضي على مستقبله فنأمل إن اللي يسمع الرسالة دي واللي في أيده أي حاجة إن يحل هذا الموضوع، إنه يساعد في الإفراج عن محمد فهمي. بالاضافه إن محمد كان بيشتغل في الجزيرة الإنجليزية مش في الجزيرة مباشر مصر اللي هي قناة تحريضيه بحته ومالهاش أي اساس، وإن الجزيرة إنجليزيه يفترض إن معاها ترخيص. وإن رأيي الشخصي إنه لا يمكن يكون ليه دخل في أي موضوع غير قانوني، فا برضه ده فارق عن اللي راح الجزيرة مباشر مصر وكان بيحرض ضد البلد، ودة لا يعنى إني مش متفق مع الرأي إن دي قناة تحريضيه وإنها فقدت مصداقيتها، لكن إحنا مش عايزين نظلم واحد من أولاد بلدنا في هذا الموضوع».