عكس عكاس| في حب البلد والغيرة على رموزها

النائب "المحترم" اللي قدم مشروع قانون تجريم إهانة الرموز اللي المجلس وافق عليه يستحق نعمل له تمثال فعلاً ، ده مش نايب عادي ولا طبيعي ، ده عبارة عن كتلة إحساس ومشاعر بتنبض بحب الوطن ، وبتخر غيرة عليه ..

 ومن فيه أجمل من حماية الرموز والشخصيات التاريخية من الصيع والمنحرفين اللي ممكن يهزوا ثقة الشباب في تاريخهم ؟ ويسببوا "آثار خطيرة على المجتمع"  

الراجل بلغت بيه الحنية على البلد إنه حذر في المذكرة الإيضاحية لمشروع القانون من " التهكم على الرموز والشخصيات التاريخية وخاصة من انتقلوا لرحمة الله، وأن الجدل الذى يحدث من إساءة لبعض الرموز التاريخية خطر وله آثار سلبية على الشعب المصرى، وزعزعة الثقة ونشر الإحباط وهو الأمر الذى تسعى له قوى الشر"

أيوه كده

حبس 5 سنين وغرامة نص مليون لأي مجرم هيفكر يزعزع الثقة وينشر الإحباط.

جدير بالذكر إن الدكتور النائب واللي هو كمان، أمين سر اللجنة الدينية في المجلس رايح جاي يغني في حب مصر وبيحذر من "مثيري الفتن" ، ومن إبداعاته انه بيطالب بإنشاء مجلس قومي للرجال ، ولما سأله المذيع في التلفزيون عن السبب قال بالفم المليان ان الراجل بيعاني من ارتفاع تكاليف الجواز والتحرش الجنسي بالرجال(اه والمصحف) ومشاكل كتير دفعته يطالب بالمجلس ده وإن الموضوع خطر على باله لما شاف نجاحات المجلس القومي للمرأة.

ومن الأخبار السعيدة إنه طور الفكرة لما اتهاجمت وقال انه انتهى من قانون المجلس القومى للأسرة، وهيقدمه قريب، وان ده بديل للمجلس القومي للمرأة ، علشان مفيش حد احسن من حد ،محتاجين مجلس جديد يشمل حقوق المرأة الراجل والطفل والشاب.

الموضوع مش واقف عند الحدود دي ،لأنه قدم طلب إحاطة لمكافحة الإلحاد،وضرورة التصدي للملحدين ، وقدم مشروع لهيكلة الأزهر، وكان بيفكر يطلّع مشروع قانون يمنع إطلاق الفتاوى العامة في الإعلام عموماً ،وعايز يطالب بكيان يحارب الاشاعات على السوشيال ميديا ويعاقب اصحابها اللي عايزين يضروا البلد.

فعلاً الواحد كل ما بيتابع إنجازات ناس زي سيادة النائب بيتفاءل خير بمستقبل البلد،وبيطمن ان اللي جاي أحلى بكتير .
------------
بقلم: خالد الدخيل