عكس عكاس| عن طبق الأومليت المركون في التلاجة من أسبوعين

بعد الدوشة ماهديت شوية ، وعمرو سلامة مابقاش يتابع كل حرف بيتكتب عن فيلمه ، وبيعد انفاس الناس في السينما ويرصد ردود افعالها ، فاضل اني اتجرأ واقول له انت نموذج محترم للمخرج اللي بيعرف يتكلم كويس ويخدم اعلاميا على أفلامه بس فاشل ..

لو تركز في شغلك الاصلي قد مابتركز تعمل حوارات في التلفزيون وتكتب على السوشيال ميديا وتجند اصحابك يشيدوا بشغلك ،كان ممكن فيلم الشيخ جاكسون ينجح ، لكن للأسف رجعت تخيب امال الناس اللي كل مرة بتراهن عليك وبتخسر ..

وطبعا كل واحد حر في رأيه وموقفه من شغل عمرو سلامة بس بستغرب من عمق المقالات والريفيوهات اللي بتتكتب، ومعنديش تفسير الا ان فيه شغل بيتعمل على حسب مزاج الشلل وتربيطاتها، يعني زي مافيه شلة لخالد يوسف وشلة لمحمد امين راضي لازم عمرو سلامة يبقاله شلة ، فما بالك وانه زاقق نفسه جنب الثوار اللي فجروا ثورة يناير اصلاً وبيقول ده في كل مكان لغاية مابقى حقيقة وخلاص ..

عموماً يحق لأي حد يشتغل ويبدع ويعمل افلام مهما كان مستواها ويحق لنا نشوفها ونحدفه بالطوب أو نوضح عدم قدرتنا على تحمل كل هذا الكم من البيض..وكمية المجاملات اللي بتقدمه باعتباره بيعمل سينما مختلفة ومستقلة وكل المصطلحات المجانية دي ..

##

في فيلم لا مؤاخذة كان باين أوي أوي وجهة نظر العيل الفافي اللي متربي في الخليج ، وقد ايه بيحتقر الفقرا وشايفهم زبالة وهمج ، وفي فيلم اسماء ظهرت اخلاق الخليج مع خلطة وائل غنيم في تبرير إصابة البطلة بالايدز ..

ولما حب يهرّج ويعمل كوميديا وكده عمل فيلم شبه طبق اومليت مركون في التلاجة من اسبوعين ، كان معاه احمد حلمي اللي كان متسيط وقاعد على عرش الكوميديا ، وياسمين رئيس اللي لسه عامله فتاة المصنع وبتتقدم باعتبارها نجمة مصرية جميلة مختلفة ، وبيومي فؤاد ودلال عبد العزيز ، وطلع لنا في الاخر بفيلم صنع في مصر ..احمد حلمي بيعمل دور دبدوب والمخرج عمرو سلامة ..كلنا عارفين النتيجة ، ولا شفنا حلمي بيضحك ولا ياسمين بتمثل ولا فيه مشاهد ولا فيلم اصلا ..ونكت سيس سطحية مايقولهاش عيل دمه تقيل في فصل ابتدائي.

المرة دي شيخ جاكسون كان طلعة تاني ..

اتعشمنا خير ..أحمد الفيشاوي واحمد مالك وماجد الكدواني وياسمين رئيس وامينة خليل وحكاية تبدو انها جديدة وفيه صراع والجو ده  ، وكانت النتيجة ان الفيلم ( مع احترامي للي شافوا انه كويس ) لافيه عقدة ولاحبكة ولا مسار تفهم منه هو ايه اللي حصل مع البطل بالظبط وليه في الحالة دي ، وليه حب جاكسون وليه ربى دقنه ؟ وايه ذنب المشاهد يتفرج على طريقة تفكير بالسطحية دي ؟ السكس والخمرة قدام الدقن والصلاة؟

المصيبة الأكبر دلوقتي انه بيستعد يعمل مسلسل كوميدي عن روايات أحمد خالد توفيق ، وسامع انه اتفق مع عمرو يوسف على تمثيل شخصية البطل رفعت اسماعيل ، كده كملت باجتماع العمرين .