رأي أعضاء الزمالك في العملية الانتخابية : مفيش تنظيم وفيه تحيز واضح لمرشح معين

بدأت انتخابات نادي الزمالك صباح اليوم، الجمعة، وبدأ الجماهير يتوافدون إلى مقر النادي لاختيار مجلس إدارة جديد وسط تعزيزات أمنية مشددة. 

وحرصت المشهد على معرفة آراء بعض الأعضاء الذين قاموا بعملية التصويت داخل المقر الانتخابي حول العملية الإنتخابية وكيفية سيرها.

قالت احدي العضوات : انا عضو هنا من أربعين سنة وقت ما كان النادي عبارة عن سور بس، مكنتش بلاقي مكان أقعد فيه كويس انا وولادي، مرتضي منصور هو اللي عمل النادي دا بعد ما كان خرابة، اها لسانه طويل وعنده عيوب، لكن الناس مينفعش معاها غير واحد زيه، كان فين أحمد سليمان السنة اللي مرتضي مشي فيها ! قدم إيه للنادي عشان نصوتله؟

انا حصل معايا مشكلة واكتشفت أن الأمن مش بيمشي عدل غير والمستشار هنا.. انا عن نفسي انتخبت مرتضي منصور وبقول لكل الأعضاء هو اللي يستاهل .

وإضافت أخري : عملية كويسة أوى وبالنسبة للنظام كل الإنتخابات لازم يحصل فيها كدا، طبيعي المرشحين يقفوا قدام اللجان كدا دا بيحصل حتي في مجلس النواب..

وأستكمل عضو آخر : عملية زبالة .. مفيش نظام ومفيش حرية ! يا افندم فى تحيز واضح لمرشح بعينه ومفيش عدل خالص، كنا نتمني تكون عملية كلها نزاهة وفيها تنظيم من قبل وزارة الشباب والرياضة ولكن الزمالك دائما بيعاني عن الأندية الأخري.

وأختتم آخر : عملية إلى حد ما مقبولة، بالفعل في دعاية كتير بره المقر وقبل دخول اللجان لكن بداخل المقر مفيش تحيز نهائي ولا تأثيرات 

إحنا فعلا عايزين تغيير ورئيس محترم يمثلنا غير مرتضي عشان كدا انا أخترت أحمد سليمان. 

وكانت قد أعلنت اللجنة القضائية المشرفة على العملية الإنتخابية أنه سيتم غلق أبواب التصويت في تمام الساعة السابعة مساء اليوم.

ويتنافس اليوم المرشحون على 12 مقعدا، وهى الرئيس ونائب الرئيس وأمين الصندوق و6 أعضاء فوق السن، و3 أعضاء تحت السن ووفقا للقائمة النهائية يتنافس علي الرئاسة 3 مرشحين وعلى منصب النائب 4 مرشحين وعلى أمانة الصندوق 4 مرشحين فيما تشهد العضوية فوق السن 37 مرشحا ويتنافس 19 مرشحا على منصب العضوية تحت السن.