(خط واللا كارت) قصيدة : سعيد صابر

* مهداة إلى أصحاب المعالى / الحكام العرب – من غاب ومن حضر

الكلام عار ع الشفايف

ليه تصالح وأنت خايف

ليه بتعمى وأنت شايف

دم اخوك طب ما أنت عارف

هو إيه أصل الحكاية ؟

قول ورددها ورايا

نفسى أبقى زى نفسى

نفسى أغتال الحروف

نفسى أتحرر يا خوف

نفسى أكون الحرف لا

والخشوع وقت الصلاة

نفسى أوهب لك شهادة

لأجل ما أكتب لك حياة

نفسى أكون حرف إنتحارى

يلغى كل كلام إدارى

ع المعاهدة والمناهدة

والسياسة والكياسة

والكياسة تبقى عارف

يعنى أيه معنى الشهادة

الشهادة يعنى حق

حقنا طب بين أيديهم

يبقى نقطع الأيادى ... ليه تدادى

ليه تنادى .. مين ح يسمع

طب أراهنك حد سامعك

دارى دمعك خد رصاصة

سمى كبر .. أضربوا كلاب الحراسة

والنخاسة الأمريكانى

قدمونا ع الصوانى

وجبة للسفاح شارون

كن يكون الأمر لك

لا تأمرك لا تهون .. يا شعب خياب الظنون

خد قرارك جا نهارك

بندقية يعنى ثارك

مشربية يعنى دارك

زينى أو ميتشيل حصارك

دوس أبوهم بالقديمة

هم دول سبب الهزيمة

يا رهين محبس رام الله

الرجال صبحوا صبايا

العرب قاعدين في ضلة

بالطرح الأمريكانى

والمعاهدة علينا هالله

بالكلام من غير معانى

المهم عملنا قمة

والعرب ناس ليها همة .. وأهل ذمة

والقضية بيطرحوها ويجمعوها

والصحارى عمروها .. حتى لو كانت ( نيفادا )

والأكادة من فلوسنا .. ومين يحوشنا

يبقى ليه نزعل يا سادة

والقضية بين وبين

تبقى خط ولا كارت

تبقى خط أحمر تفرمل

واللا كارت بلانش ليهم

هو مين يقدر عليهم

يا رهين محبس رام الله

العرب زيك رهينة

شكلوهم كالعجينة

واللى زاد البلة طينة

إننا دايما في قمة

نبقى في قمة سعادة

نبقى في قمة بلادة

قمة طارئة يعنى أيه

يعنى طارئة بالتلاتة

التلاتة المحصنات

السلام ويَّا الخيار

وإستراتيجى الحبايب

اللي حاضر واللي غايب

يبقي نعمل قمة تانية

غير عادية مش غبية

لأجل نعرف القضية

يا رهين محبس رام الله

تبقى خط ولا كارت

الإجابة يعلم الله

يا عرب مليون ألوووووووووه

لازم الخط إنقطع

يبقى بكرة نصلحوه
-----------------------
شعر : سعيد صابر