أوكا وأورتيجا ..استشيخ يالا

فيه نجم افراح مشهور بحري اسمه كتكوت ..هو تحسه نوباتشي أكتر منه مطرب لأنه كل "أعماله" عبارة عن ملاغية للبرنس الكبير والمعلم الشهير محمد عبد السلام ..

بس كتكوت كان سبب في شهرة عبد السلام أكتر وأكتر بعبارات ملحنة زي " مخدرات يا عبسلام" او "اهدى عليي" لكن كان أشهر حاجة بيقولها هي "العب يالا" علشان ينطلق عبسلام ويولع الدنيا ..اهي الجملة دي سرقها اوكا واورتيجا وعلموا بيها اغنية المهرجانات الأشهر حاليا بنفس الاسم ..

بس هم اصيع طبعا

حطوا عليها شوية بهارات ...واستشيخوا وحذروا من الشيطان وجو التدين الوسطي الجميل ده علشان يكسبوا الكل ، يعني لو أب دخل لقى ابنه بيشكل على الاغنية هيسمع:

قاعد لوحدك ...كده سرحان ..شيطان يوزك في سكة شمال

يفضل يقول لك ...العب يالا

عايز تكون صاحب مبدأ ...بطل الدرجز ..وتقول انا هابدأ

تبقى قاعد ..سامع الادان ...نفسك تقوم ..فيه حاجة مانعاك ..

ابليس يقول لك ..انا عايز اهلس...خليك هنا ..ماتلعب يالا

بالتأكيد الأب هيغمض عنينه بابتسامة ملائكية وهيقفل الباب ...أو اذ ربما يدخل يشارك ابنه في التشكيل.

على الهامش: اغاني المهرجانات من أعظم الانجازات الموسيقية اللي حصلت في السنين الأخيرة ، بل ان فيه اغاني مالهاش حل وعايشة سنين زي انتش مثلا ..

ده غير ان فيفتي وسادات والمدفعجية وغيرهم لهم شغل هايل جدا..بس الصدق بيبقى احسن من الاستعباط ...يعني اغنية عظيمة زي انتش ..او ( أم ...) اللي انتشرت من اسابيع اصدق واعظم بكتير من جو استشيخ يالا ده .