ويبشبش الطوبة اللى تحت راسك .. يا مبارك ؟!

أعترف أنى من المتأمرين الوحشين وشاركت فى مؤامرة 25. 

وحأقولك عملت إيه لتهييج الناس؟ روجت لشائعة أن مبارك يريد توريث الحكم لابنه؛ ومشيت أعلق صور المحروس جمال فى كل شارع فى مصر، وعملتله شعار لحملته الانتخابية (من أجلك أنت)! وأنا اللى استوردت القمح المسرطن، وأنا اللى خلطت مية الشرب بمية المجارى، وأنا اللى قلبت البلد لمحسوبية ورشاوى.

وأنا اللى جبت جركن بنزين؛ ورميته على القطر فى العيد وولعته، وأنا اللى عملت الصناديق الخاصة، وأنا اللى خرمت العبارة وغرقت المصريين فى البحر.

وأنا اللى قتلت المتظاهرين ، وأنا اللى دهستهم بالمدرعات ، وأنا اللى قنصتهم، تصدق.. أنا مجرم أراري، وأنا اللى بطالب بمحاكمتى.. علشان تآمرت على النقى التقى الورع مبارك، مبسوطين.

واحد غيرى متفائل شويتين؛ قالك : عارفين البرص لما تضربوه بالشبشب ورأسه تنقطع عن ديله؛ يفضل ديله يلعب شويه كده. وطبعا البرص مش دريان أن دى حلاوة روح؛ وأن الرأس أتقطعت خلاص وماينفعش ترجع تانى.

أهو البرص ده بقى؛ هو نظام مبارك وأنصاره.

بس ياريت القصة كده وبس والسلام عليكم، وأهو كلمتين طق حنك. القصة أن مبارك ما مشيش؛ عشان يرجع تانى.

واذا كان مبارك وعياله وكام واحد من أركان نظامه اتسجنوا، ومات هو، وخرج عياله وصبيانه من السجن . ففى كام مليون - ولا أبالغ فى الرقم - من شلة وعصابة مبارك.

عندك فى الإعلام؛ وعندك فى كل هيئة ومؤسسة عامة؛ وعندك كمان كام راجل أعمال فاسد.. ولسه عداده بيعد.

بس اللى يفرسك بجد، إن عندك كمان ناس غلابة فقرا، مساكين ومتاكدين أنه ولا يوم من أيامك يا مبارك. 

يا زعيمنا فى البر وفى البحر وفى الجو .. وفوق السطوح كمان؟!
-----------------------------
بقلم: خالد حمزة