نور : بيت الروبي كنت عارفة أنه هينجح بس متخيلتش أنه هيوصل للدرجة دي

عبرت الفنانة نور عن سعادتها بنجاح فيلم "بيت الروبي" وبردود الأفعال على العمل.

قالت نور في مداخلة هاتفية لها مع الإعلامية لينا الطهطاوي في برنامج "كلاكيت" أنها لم تتوقع النجاح الباهر للفيلم.

وتابعت "كنت عارفة أنه هينجح بس متخيلتش أنه هيوصل للدرجة دي كانت مفاجاة ليا"

وعن تعاونها مع كريم عبد العزيز قالت "أول مرة اشتغل مع كريم كدراما بس عملت معاه اعلانين وكل الناس عارفة أن كريم لذيذ وقريب من القلب وهو فنان كبير وموهوب ومع توجيهات المخرج وكتابة حلوة قدرنا أننا نقدم الفيلم بشكل طبيعي وهو محبوب عند الناس ومش مصطنع"

وأضافت "ودة كان التحدي في الدور أنه كان لازم يبقى طبيعي ودة السهل الممتنع والحمدلله الناس حبت الشخصية"

وعن اختيارها لادوارها مؤخرا قالت "الممثل بيعدي بمراحل الأول البنت الحلوة وبعدين يبقى عنده خبرة وبعدين يحب يقدم أدوار مركبة وبعدين بنوصل لوقت أننا مش عايزين نثبت أي حاجة احنا بس عايزين نستمتع ودة حصل في بيت الروبي وكنت مستمتعة اوي بيه"

كما تحدثت نور عن ردود أفعال الجمهور على الفيلم وقالت "ناس كتير دخلت الفيلم أكتر من مرة والفيلم فيه كوميديا ودراما وفيه رسالة حلوة وفي أعمال بتبقى كاملة"

وعن أعمالها القادمة قالت "بحضر لحاجات هعلن عنها في الوقت المناسب وبحاول اختار حاجات حلوة وممكن اقدم خلالها حاجات جديدة"

يذكر أن فيلم "بيت الروبي" من بطولة كريم عبد العزيز، كريم محمود عبد العزيز، نور، تارا عماد وغيرهم نخبة من النجوم.

الفيلم من تأليف محمد الدباح ومن إخراج بيتر ميمي، دارت أحداث الفيلم حول السوشيال ميديا ومدى تأثيرها من خلال شخصية "إبراهيم الروبي" وزوجته التي عانت من الهجوم عليها على السوشيال ميديا فيضطر زوجها أن يسافر بأسرته لإحدى المدن الساحلية هربا من السوشيال ميديا ولكنه يضطر للعودة مجددا للقاهرة وتتوالى الأحداث.