كلام والسلام | قلبي ومفتاحه .. وزمن العتاولة

باب الجمال أول ما جت .. قفّلنا ترابيسه.

والقلب مال .. اتفننت جداً في ترقيصه .

قلبي أتهـ ـبل .. دُقّوا الطُبَل .. غنوا بقا وهيصوا .

توب الفرح مظبوط عليها .. قبل ماتقيسه .

من كتر مسلسلات البلطجة .. وشخصيات مثل العتاولة وسيد الناس والبطل وإخواتهم .. كنا قربنا ننسي أن لسه في رومانسية وأعمال علي الهادى.. وممثلين من عينة مى عز الدين وأسر يس. وأشرار  تقال من عينة دياب. وشخصيات السهل الممتنع من عينة اشرف عبد الباقي . واكتشاف متٱخر للعزب شو.

وان القلب ومفتاحه بصوت فريد الاطرش .. لسه ملك ايديك ..

يا لهووووى .

وافضل شىء في مسلسلات رمضان، إنها عرت لك مجتمعك كله من فوق لتحت ومن تحت لفوق .. قالت لك أنه لو كان هناك بلطجية من عينة الوزان والجارحى والبطل وقتالين قتلة وستات مش ولابد وباعة حشيش وسلاح ومنوعات ومنتاجرين بأجساد النساء .

فإنه برضه هناك .. ناس عايشين علي الفطرة زى ولاد الشمس و٨٠ باكو وناس لسه عندها بقية إحساس زى قلبي ومفتاحه.

وعرفت كمان أن هناك ممثلين تقال جدا وممثلين علي أد حالهم وممثلين لحد ماتفرج. ورمضان كاشف .. وهذه المرة لفنان .. والفنان ده.. فيه شيء لله.

قعد سنين يتخبط.. لا دور عدل .. ولا طلب عليه. محدش كان معبره. وقرب يسيب الشغلانة.

لغاية مارينا مافتحها عليه من وسع.. ببرنامج خطف القلوب والعقول .. ربك رب قلوب .

هو .. سامح حسين .
-------------------------
بقلم: خالد حمزة
[email protected]