فيديو.. بـ"جعلتني مجرمًا".. حلمي ينعي يوسف عيد: "الناس كانت بتعرف أفلامي من افيهاته"

أعرب الفنان أحمد حلمي عن حزنه لرحيل الفنان الكوميدي يوسف عيد مساء أمس الأحد، مؤكداً أن الجمهور كان يعرف أفلامه من خلال الافيهات التي كان يلقيها عيد.

ووضع حلمي فيديو لمشهد يجمعه بالفنان يوسف عيد في فيلم "جعلتني مجرماً"، وكتب عبر صفحته الرسمية بموقع التواصل الاجتماعي "فيس بوك":

حوار سمعته في يوم من الايام بين اتنين :

الأول : عارف الفيلم اللي اسمه .. اسمه .. مممم ..

التاني : اسمه ايه ؟

الأول : هافكرك بيه .. اللي هوه كان يوسف عيد بيقول فيه اضربك فين ؟ وشك مافيهوش مكان ..

التاني : ااااااه .. ده اسمه جعلتني مجرما ..

لما الناس تفتكر اسم فيلم من جمله او افيه قالها ممثل جوه الفيلم ساعتها لازم تؤمن ان الممثل ده عنده حضور وكاريزما عاليه .. وان الناس بتحبه .. ده كان يوسف عيد الله يرحمه .. بمجرد انك تشوفه لازم تبتسم .. تضحك حتي لو مقالش ولا كلمه .. روحه حلوه وطلته خفيفه .. تلاقيه دايما موجود في بالك ودايما بتفتكره .. حتي لو مكونتش بتشوفه كل يوم او حتي مره كل سنه .

وأضاف : "الله يرحمه ويحسن اليه .. كنت دايما بتمني انه يكون معانا في اي فيلم بنعمله واني اشتغل دايما معاه .. المشهد اللي فيه الآستاذ يوسف كان دايما بيضيف بسمه وضحكه لاتنسي .. وكانت الناس احيانا بتفتكر اسم الفيلم من افيه قاله يوسف عيد.