جمال العدل: "محمد هنيدي المفروض يشتغل على نفسه ... ويعمل أفلام أحسن من كده"

كشف المنتج جمال العدل كواليس خلافه مع النجم محمد هنيدي، بعد إعلانه عن إنتاجه الجزء الثاني من مسلسل "أرض النفاق" بمفرده.

وقال جمال العدل خلال استضافته في برنامج "حبر سري"، الذي تقدمه الإعلامية أسما إبراهيم عبر قناة القاهرة والناس: "هنيدي قرر يعمل أرض النفاق 2 لوحده للأسف ومن حقه قانونا، لكن الحق الأدبي للمخرج سامح عبد العزيز رغم إنه صور ساعة وغادر العمل، لكن هو من كون المسلسل وفريق الأبطال والديكور والملابس، والمخرج محمد جمال العدل كمل على شغله".

وأضاف: "اللي غايظني إن هنيدي دلوقتي نجم مهم وكبير وله جمهوره وعيب يعمل كده، ولما نزل صورة للجزء الثاني كلمته وسألته على واتس آب، ومردش عليا لغاية دلوقتي".

وتابع: "رأيي إن الجزء الثاني كان ممكن ينجح في وقتها مش بعد 6 أو 7 سنين".

وردا على سؤال عن رأيه في إيرادات آخر أفلام محمد هنيدي "مرعي البريمو"، قال جمال العدل: "أنا عارف إن الإيراد وحش، ممكن بسبب توقيت نزول الفيلم، أو ظروف السوق، أو موزع الفيلم، في عوامل كثيرة".

أوضح جمال العدل أنه لم يشاهد "مرعي البريمو" بقوله: "أنا سامع إن الفيلم مش حلو، لكن هنيدي نجم كوميدي له جمهوره، والمفروض يتعب على نفسه شوية ويعمل أفلام أحسن من كده، وفي بعض ساعات الناس ممكن تستسهل أو تسمع دماغها، وقرار إنه ينتج لنفسه غير صحيح".