بعد أزمة رشوان توفيق.. فنانة شهيرة تكشف تفاصيل تعرضها للضرب والسب والسلب من أبناءها

أزمة عقوق جديدة تعرضت لها فنانة شهيرة على يد أبناءها، حيث قالت إنها تعرضت للشتم والضرب، وسلب أموالها، وأضافت الفنانة شريفة ماهر التي تحمل الجنسية السويدية أيضا أنها تفضل الإقامة في مصر دائمًا: «مش بطيق أقعد في السويد أكتر من شهر.

و خلال حوارها مع الإعلامية بسمة وهبة تطرقت إلى خلافاتها مع أبنائها، قائلة: «وزعت جزء كبير من ميراثي ، شريف وطارق شتموني، شريف زقني مرتين ودراعي اتكسر من 4 سنين، ولادي أخدوا كل اللي حيلتي، وشريف قالي هقلعك هدومك».

وحول ابنتها ناهد، وقالت إن ابنتها ناهد  «مش حنينة وقلبها جامد عليّ منها لله وقلبها أجمد من إخواتها ومسألتش عليّ، ولفت شريف وهو طول عمره بيحب الفلوس أكتر من أبوه وأمه، بيعبد القرش».

وأشارت، إلى أنها اعتزلت الفن وارتدت الحجاب منذ 45 عاما، وأطلقت الكثير من المشروعات العقارية: «في فيلم أعز الحبايب شكري سرحان ضربني بالقلم وعيني جابت دم، ومبقتش أشوف كويس وشريف استغل الحكاية دي وكان بيمضيني على العقد وكتير أوي، مضاني على 4 عقود معرفش فيهم ايه».

وتابعت: «مش هشتكيه وربنا هيجيب لي حقي، وطلب مني يروح يقعد معايا في شقة جاردن سيتي، ومضاني وأنا مش بشوف على حاجتي مش بتاعتي وهي الشقة دي الإيجار، وأبوه قبل ما يموت قالي هأمنك عشان شريف لما هموت هيقلعك هدومك وفعلا طول عمره بيعبد الفلوس ومكنتش أتخيل إنه يعمل فيّ كده، بقاله 9 أشهر مقاليش انتِ فين».

وأضافت، إلى أنه طردها من شقتها التي كانت تقيم فيها بمنطقة جاردن سيتي بنظام الإيجار: «قاعدة في العمارة بتاعتي في المهندسين وكاتباها باسم بنتي نيفين، وحد قالي إن شريف طلب الفيلا من الشهر العقاري رغم إن نيفين مسجلاها، وفعلا استولى عليا شريف خان الأمانة».

وخلال بكاءها على الهواء أثناء الحوار، أجرت مقدمة البرنامج مداخلة هاتفية مع نجلها الذي اتهمته بضربها وسبها والاستيلاء على أملاكها مستغلا قلة حيلتها وضعف نظرها.

وقالت: «الله لا يكسبك يا بعيد، ورينا الأوراق مش الكلام أنا مش مضيت لك على حاجة، انت اللي مضيتني، انت سلطت البواب عليّ وبيقوله ميجيبليش حاجة وبيقول للناس إن عندي زهايمر، حسبي الله ونعم الوكيل فيك، ربنا ينتقم منك»، ليرد عليها نجلها، قائلًا: «عارف إن الجنة تحت أقدام الأمهات، مش ممكن أشتمها وايدي تتقطع قبل ما أمدها، لكني اشتريت الشقق اللي عليها المشكلة وعامل صحة توقيع منذ 2007 والمهندس الذي بنى العمارة معها شهد على هذه العقود».

لترد عليه والدته: «مزورة وهسجنك»، وعقب، قائلًا: «بتقول بايعة لبنتها منذ عام 2011، وازاي هغير عقد البيع اللي هي بايعاه، اديتها فوق المليون جنيه وفوق الـ100 ألف جنيه سمسرة في الفيلا التي باعتها».

وصرخت الفنانة شريفة ماهر في وجهه، قائلةً: «يا كداب، انت بتصلي انت؟! انت كداب وضلالي ربنا ينتقدم منك يا بعيد وربنا يوريني فيك يا بعيد  ربنا هينتقم منك يا بعيد  يا حرامي».

وأكد شريف، أن أمه حررت محضرا ضده واتهمته فيه بالضرب والشتم وكسر الشقة دون وجود أي إصابات، وهو ما يتضارب مع روايتها الآن التي تقول فيها إنه تسبب في كسر ذراعها منذ 4 سنوات، موضحًا أن النيابة حفظت المحضر.

وأوضح قائلًا: «باعت شقتي لحد تاني ومرضتش أعمل محضر فيها ولحد الشهر اللي فات بعتلها لحمة وفراخ وأرز ومكرونة وببعتلها مؤن تكفيها شهر كامل»، لترد عليه والدته: «رمتهم».