(أرشيف المشهد)

4-11-2012 | 20:08

نجح أوكا و أورتيجا.. و بقية زملائهم الذين صعدوا بهذا اللون الغنائى (اللى بيسموه مهرجانات ).. إلى واجهة المشهد الفنى، فى جذب كثير من المحبين.. و كثير أيضًا من الرافضين..

أما المحبين.. فلا يُسأل محب لماذا أحب.. قد يبوح هو.. و لكن لا يُسأل

وبالميزان نفسه لا يُسأل من لا يُحب.. الحب والكره يمكن أن يعيشا بلا أسباب

ولكن النقد والرفض لهذا النوع من الغناء بحجة أنه (غناء تافه).. فهذا لا يعيش بلا أسباب كالحب و الكره.. و لكن هذا الكلام لكى يعيش و يكون له اعتبار يجب أن يقدم أسبابه.. حتى لا يفقد قيمته فيصبح كلامًا فارغًا..

غناء المهرجانات تعبير عن بشر عايشين بيننا.. و حوالينا و معانا.. و احنا اللى مصممين نغمض و نقول: ياااااى

الواد أبو صوت أجش موجود ؟ - آه موجود.. العيال اللى بتلعب فى الحارة عشان مافيش أندية و لا حتى ساحات شعبية موجودة ؟ - آه موجودة.. بيحصل إن العيال دى تبطل لعب لحد عم الحاج ما يعدى ؟ - آه بيحصل.. عيال غلابة بيحبوا الحياة و لما بيرقصوا بيبقوا زى اللى تايهة منهم .. أو تقول إن رقصهم أشبه برقص الزار الذى يَـنْـفُـض عن النفس أحزانها؟.. آه كل ده موجود.

....... طيب ......

تعالى بقى سعادتك و قول لى كام واحد بيعمل كوشة على الرمال بالإضاءة الحمراء و يرتدى زيًّا أبيض شفاف.. و يحتضن فتاة فاتنة الجمال بملابس بيضاء شفافة.. ويتبادلون كؤوس النبيذ و يرقصون بلا خوفٍ من نظرة مجتمع.. و ينظر فى عينيها بحب و يقول : ( طـيـيـيـيـيـ.. بة قلبك)..؟

و كمان سؤال لو سمحت.. ما القيمة التى تركها نجم محبوب و مقدر من الجمهور و الصحافة و الإعلام و المؤسسات الرسمية مثل عمرو دياب.. مع كامل الاحترام له؟.. لكن السؤال لا هو عيب و لا حرام

العيال بتوع المهرجانات حقيقيين.. بعبلهم كده بس حقيقين و صادقين..

يا اهل الله.. سيبوا كل الناس تعبر عن نفسها.. واللى يعجبكم روحوا له و اللى ما يعجبكمش نفضوا له.. و خلاص.. و كل فولة و لها كيال.. و بين البايع و الشارى يفتح الله.. و ماحدش يتعالى على حد.. و الى شايف إن عنده أحسن يتفضل يقدمه (احنا نتمنى).. و ما تغلطوش غلطة اللى قبلكم لما راحوا ورا النخبة الفسدانة و حولوا أشرف و أنبل كلمة على لسان أى إنسان، مادة للتريقة و السخرية.. ( بلدى قوى ).. !!!